биологиялық құралдарды қолдану тәсілдері

(Способы применения биологических средств)

қарсыластың жерді және сыртқы орта объектілерін ауру туғызушы микроорганизмдермен және токсиндермен, сұйық және құрғақ биологиялық рецептуралар түрінде зақымдауы. Мейлінше тиімділері – аэрозоль пайда болу үшін ауада сұйық және құрғақ түрінде тозаңдатылған вирусты риккетсиозды микробтар мен токсиндер. Зақымдау әсері ауаның жерге жақын қабатына биологиялық аэрозольмен келетін бөлшектердің (микроб клеткаларының) мөлшеріне, сондай-ақ қорғанбаған адамдардың зақымданған атмосферада қанша уақыт болуына байланысты. Аэрозоль бұлтының зақымдаушы әрекетінің ұзақтығы микроорганизмдердің физикалық және биологиялық тұрақтылығымен анықталады. Физикалық тұрақтылығына метеорологиялық жағдайлар – желдің жылдамдығы мен бағыты, бұлттылық, жауын-шашын, ауа мен топырақтың температурасы, сондай-ақ жер бедері, елді мекендер құрылыстарының сипаты, ал биологиялық тұрақтылыққа олардың ауру туғызушы ықпалын ұзақ уақыт бойы сақтау қабілеті әсер етеді.

Б.қ.қ.ә-нің көп таралған бір түрі – жергілікті жерге өте қауіпті жұқпалы ауру жұққан жәндіктерді тарату. Олар ұзақ уақыт күшті жұқпалы аурулар ошақтарын тудырады. Оларды тарату үшін контейнерлер мен энтомологиялық бомбалар қолданылады. Авиациялық және ракеталық ұрыс құралдары арқылы қолданылатын бактериялық құралдар және әсіресе олардың улары қалалық су құбырларын, су көздерін, тамақ өнімдерін зақымдауға арналған.